Skipulag í vinnslu
Í skipulagsvinnu Norður-Mjóddar hefur áhersla verið lögð á að skapa umgjörð um fjölbreytta byggð sem styrkir m.a. alla þá verslun og þjónustu sem fyrir er í hverfinu. Markmiðið er að móta grundvöll um fjölbreytt mannlíf, auka fjölbreytileika í búsetukostum og skapa ný almenningsrými sem stuðla að aukinni útiveru og félagslegum tengslum í hverfinu.
Blönduð byggð
Markmiðið með uppbyggingu í Norður-Mjódd er að skapa fjölbreytta og blandaða byggð. Svæðið hefur marga kosti, eins og nálægð við fyrirhugaða Borgarlínustöð, þjónustu í Mjódd og fallegt útivistarsvæði í Elliðaárdal. Skipulagið styður við stefnu Reykjavíkurborgar um þéttingu byggðar og betri nýtingu lands og innviða.
Mannvæn hönnun og umhverfisgæði
Byggðin verður skipulögð með mannlegan mælikvarða í huga, með fjölbreyttu íbúðarvali, skjólgóðum og sólríkum dvalarsvæðum og góðri tengingu við stíga og aðliggjandi byggð. Hugað er að áhrifum uppbyggingar á nærliggjandi hverfi meðal annars vegna tenginga og áhrifa skuggavarps. Líffræðileg fjölbreytni og vatnsbúskapur verða hafðir í huga í hönnun svæðisins, auk þess sem gert er ráð fyrir blönduðum ferðamátum.
Aðlögun að Borgarlínu
Mjóddin er einstaklega vel tengd stofnbrautum og almenningssamgöngur þar eru öflugar. Borgarlína mun efla almenningssamgöngur á svæðinu enn frekar. Ráðgerð staðsetning biðstöðvar hennar, við Stekkjarbakka, hentar fyrirliggjandi íbúðasvæðum ekki síður en nýrri byggð í Norður-Mjódd.
Hönnunaráherslur í arkitektúr og landslagi
Hönnunaráherslur Norður-Mjóddar
Í deiliskipulagsvinnu koma fram leiðbeinandi hönnunaráherslur í arkitektúr. Áherslurnar verða hafðar til hliðsjónar við hönnun bygginga og landslags.
Myndirnar eru úr öðrum verkefnum og sýna dæmi um útfærslu þeirra hönnunaráherslna sem lagt er upp með í deiliskipulagsvinnu.
Náttúrulegir litir, stallaðar byggingar og ríkjandi láréttar línur
Stallar og lagskiptur massi líkir eftir fjalllendi
Heildstæð ásýnd og einsleit litanotkun í klæðningum
Sérafnotareitir afmarkaðir með stein og gróðri
Safnlautir í inngörðum eru hluti af blágrænum ofanvatnslausnum
Láréttar línur og sterk tenging milli inni og útisvæða
Lagskiptur massi fellur inn í landslagið og viðheldur láréttum línum
Heildstæð ásýnd og einsleit litanotkun
Áherslur í landslagshönnun
Í deiliskipulagsvinnu koma fram leiðbeinandi áherslur í landslagshönnun þar sem reiknað er með óformlegu og náttúrulegu yfirbragði með fjölbreyttum gróðri.
Myndirnar eru úr öðrum verkefnum og sýna dæmi um útfærslu þeirra hönnunaráherslna sem lagt er upp með í deiliskipulagsvinnu.
Inngarðar ofan á bílakjallara með gróðurþekju
Dvalarsvæði og leiktæki
Láréttar línur og sterk tenging milli inni og útisvæða
Litapalletta
Asýmetrískar þaklausnir
Góð tengsl upphækkaðra sérafnotaflata og umhverfis tryggð með tröppum
Sameign auðkennd með yfirborðsefni
Ný uppbygging í grónu hverfi
Neðra-Breiðholt var skipulagt á sjöunda áratugnum. Árið 1967 lá fyrir samþykkt skipulag af íbúðabyggð í Neðra-Breiðholti og árið 1976 var hverfið að mestu fullbyggt.
Norður-Mjódd tilheyrir Neðra-Breiðholti sem afmarkast af Reykjanesbraut í vestri, Breiðholtsbraut í suðri, Efra-Breiðholti í austri og Elliðaárdal í norðri. Neðra-Breiðholt skiptist í þrjá hverfishluta, Bakka, Stekki og uppbyggingarsvæðið í Norður-Mjódd. Bakkar og Stekkir eru hefðbundin íbúðarhverfi með skýrri skiptingu á milli fjölbýlishúsa, raðhúsa og einbýlishúsa.
Skipulag Neðra-Breiðholts byggir á þeirri meginhugmynd að ramma byggðina inn með safnbraut, og hafa innan hennar mynstur fjölbýlishúsa. Fjölbýlishúsin opnast inn á við og tengjast verslunar- og þjónustusvæði í miðju hverfinu, þar sem jafnframt er skóli og dagvistunarstofnanir.
Áætluð framvinda þróunar
2023
Skipulagslýsing lögð fram
Skipulagslýsing fyrir Norður-Mjódd var lögð fyrir umhverfis- og skipulagsráð í júní 2023. Í kjölfarið var hún samþykkt af borgarráði og kynnt kynnt opinberlega, þ.e. almenningi gefinn kostur á að koma ábendingum á framfæri við Reykjavíkurborg í gegnum Skipulagsgátt. Samtímis var leitað umsagnar Skipulagsstofnunar og annarra umsagnaraðila.
Skipulagslýsing er skjal sem sem lóðarhafi eða skipulagsyfirvöld gefa út í upphafi vinnu að deiliskipulagi, í því er tekin saman lýsing á verkefninu þar sem greint er frá megin tilgangi og markmiðum, gerð grein fyrir tildrögum vinnunnar og hvernig fyrirhugað er að standa að skipulagsgerðinni.
2023 - 2025
Skipulagsvinna hófst í kjölfar opinberrar kynningar skipulagslýsingarinnar. Fulltrúar Reykjavíkurborgar og Klasa sátu samráðsfundi þar sem farið var yfir áherslur og stefnumótun varðandi lykilþætti.
Deiliskipulagstillaga er unnin í samræmi við lýsingu skipulagsverkefnisins og með hliðsjón af þeim ábendingum sem borist hafa frá almenningi og umsagnaraðilum á fyrri stigum. Við gerð deiliskipulags eru umhverfisáhrif metin og niðurstöður umhverfismatsins nýttar við endanlega mótun skipulagstillögunnar.
Deiliskipulagsvinna og samráð
2025
Skipulagstillögur auglýstar, samþykktarferli og gildistaka
Markmið þróunaraðila er að deiliskipulagstillaga verði send til Umhverfis- og skipulagsráðs til kynningar og vísað til auglýsingar í kjölfarið.
Þegar frestur til athugasemda er liðinn tekur Umhverfis- og skipulagsráð afstöðu til athugasemda og leggur fram endanlega tillögu til samþykktar í borgarráði. Deiliskipulagið ásamt fylgiskjölum er síðan sent Skipulagsstofnun til yfirferðar. Deiliskipulag tekur gildi þegar það hefur verið samþykkt af sveitarstjórn og auglýst í B–deild Stjórnartíðinda.
2026 +
Hönnun og uppbygging
Þegar fullnaðarhönnun byggingar liggur fyrir og tilskilin leyfi hafa verið veitt er hægt að hefja uppbyggingu. Uppbygging deiliskipulagsreitsins er ráðgerð frá norðri til suðurs. Gera má ráð fyrir að uppbyggingu verði lokið á 4-7 árum m.v. eðlilegar ytri aðstæður, s.s. efnahagsástand og eftirspurn á markaði.
BREEAM vottað skipulag
Unnið er með áherslur BREEAM Communities vistvottunarkerfisins í skipulagsvinnunni og lögð áhersla á lykilþættina fimm:
Samráð og stjórnun samfélagið tekur þátt í mótun og ákvarðanatöku.
Félagsleg og efnahagsleg velferð stuðlað er að bættum lífsgæðum.
Auðlindir og orka dregið úr kolefnislosun og auðlindir nýttar á sjálfbæran hátt.
Landnotkun og vistfræði verndun náttúru og aðlögun að loftslagsbreytingum.
Samgöngur og aðgengi lausnir sem hvetja til vistvænna samgangna.
